Порано центри на културните збиднувања во селата беа домовите на културата каде се одвиваа сите приредби, гостувања на естрадни уметници, кино престави и сл.Постоеја фолклорна играорна група, женски пеачки хор и постојани кино престави кои во многу го богатеа културниот живот во општината.
Во последно време културно-забавниот живот на луѓето е на многу ниско ниво. Истите презафатени во борбата за сопствена егзистенција како да немаат време за духовното, за убавата музика, за пишаниот збор. Истото се однесува и за младите кои се помалку се ангажираат во школските секции а младинскиот културен живот е скоро потполно замрен. Ги нема некогашните матинеа и игранки, богато посетените кино престави и празнични приредби.Сега се се сведува на посета на неколкуте кафичи кои ги има во општината.Секако дека за ваквата состојба е виновна и општата економска криза во земјата но сепак останува потребата нешто повеќе да се стори на ова поле во иднина.
Инаку што се однесува до културните домови, нив ги има и во трите села, додека културниот дом во Зрновци е комплетно опремен за изведување на кино престави, театарски претстави и други манифестации. Во Зрновци постои и друг јавен објект, тоа е Соколаната која е реновирана од страна на општината, но сега за сега не се употребува за никакви културни активности.

Што се однесува до невладиниот сектор од март '97 год постои и успешно делува Еколошкото друштво "Јавор" од Зрновци. Има околу 170 членови а има и свој подмладок кој работи во ОУ "Тодор Арсов". Досега има изработено два успешни проекта; Еко слика на Зрновци - '97 и Меѓународен Еко-камп Плачковица '98 Во тек е реализацијата на уште два проекта. Тоа се: Проектот Стоп за дивите депонии кој отпочна во јануари '99 и ќе трае до октомври '99 и проектот Одржлив развој на општина Зрновци кој отпочна во јуни '99 и ќе трае до декември '99 год, а во чии рамки е и оваа студија.Еколошкото друштво ќе продолжи со реализацијата на овие и наредни проекти давајќи на тој начин свој допринос во решавањето на еколошките проблеми во општината и пошироко. Во јули '99 год. се формира и нова невладина организација а тоа е Здружение на ловци "Кукла" од Зрновци.